अतिक्रमित नेपाली भूमिमा सेना पठाउन सांसदहरुको माग



काठमाडौं – भारतद्वारा अतिक्रमित सीमा क्षेत्रमा तत्काल सेना पठाएर नेपाली भूमिको रक्षा गर्न सांसदहरुले सरकारसँग माग गरेका छन् ।परराष्ट्रमन्त्री प्रदीप ज्ञवाली र भूमि व्यवस्थामन्त्री पद्मा अर्याल उपस्थित अन्तर्राष्ट्रिय सम्बन्ध समितिको बैठकमा बोल्दै सांसदहरुले उक्त माग गरेका हुन् ।

सांसद प्रेम प्रसाद तुलाचनले सीमा सुरक्षाका लागि तत्काल नेपाली सेना पठाउन माग गरे । ‘अतिक्रमण गरिएको क्षेत्रमा सीमा सुरक्षाका लागि सेना पठाइहाल्नुपर्छ । विगतका क-कसले के–के गल्ति गरे त्यसको पनि खोजविन हुनुपर्छ,’ उनले भने, “अहिलेको सरकार र विगतका सरकारका बीचमा दोषारोपण गर्ने भन्दा समस्या समाधान गर्नु नै उपयुक्त हुन्छ ।’

अर्का सांसद चाँदतारा कुमारीले पनि सीमामा सेना पठाउन र कुटनीतिक तरिकाले भारतसँग वार्ता गर्न माग गरिन् ।
बैठकमा बोल्दै सांसद भीम रावलले विगतमा अरूले गरेनन् भनेर आजको दायित्वबाट सरकारलाई पन्छिने छुट नभएको भन्दै तत्काल विज्ञ टोली सीमा क्षेत्रमा पठाउन माग गरे । उनले सीमा विवादबारे राज्यका निर्देशक समितिले कति पटक निर्देशन दियो कति पटक कार्यान्वयन भयो ? भन्दै प्रश्न गरे |

भारतले नेपालको भूमि अतिक्रमण गरेर सडक निर्माण गर्नु दुई देशको असल छिमेकीको सम्बन्ध विपरित र अन्तर्राष्ट्रिय कानून विपरित रहेको भन्दै रावलले आपत्ति प्रकट गरे ।उनले दार्चुलाको सबैभन्दा धेरै जमिन अतिक्रमण भएको बताउँदै नेपाली सीमानामा भारतले ४५ हजार सुरक्षाकर्मी परिचालन गरेको उल्लेख गरे । उनले तत्काल अतिक्रमण भएको क्षेत्रमा विज्ञ टोली पठाउन पर्ने तथा नेपालको नक्सा प्रकाशन गर्नु पर्ने बताए ।दिल्लीमा रहेको राजदूतलाई अह्रराएर केही काम नहुने भन्दै रावलले स्थलगत रुपमा के भइरहेको छ भनेर नेपाल सरकारले किन नहेर्ने भन्दै प्रश्न गरे ।

सांसद उमा रेग्मीले ७ महिना अघि भारतले नक्सा सार्वजनिक गर्दा नेपालको भूमिसहित नेपालको पनि नक्सा सार्वजनिक गर्न समितिले सरकारलाई निर्देशन समेत अटेरी गरिएकोमा आपत्ति जनाइन् ।भूमि व्यवस्थामन्त्री पद्मा अर्यालले नक्सा प्रकाशन गर्न प्राविधिक समस्या पर्यो भनेर दिएको अभिव्यक्तिलाई स्पष्ट पार्न माग गरिन् ।सीमा मिचिएकोबारे प्रधानमन्त्रीस्तरीय वार्ता गर्न आग्रह गर्दै रेग्मीले यो कुनै दल र सरकारको मात्र समस्या नभइ देशको समस्या भएको उल्लेख गरिन् ।


प्रतिक्रिया दिनुहोस